Urriγ d
3bdllah Lmnnani
Urriγ d gim flγ nn tanawt
ar tettmlilliy γ ill n taγalin
hayi snalγ am nn ḍaṛat
flγ nn gim tisit inw
ad tsgummi i tkttay ibridn
iklulan s imdla
ad nn gis tsurnt tsgiwin
ur ikki udriz nnm
ad gisn arudγ
fawγ d fllasn am tafukt
γ ignwan n ussan inw
flγ nn gim azrg war askwti
ad t tḥlliln ifassn
ur iẓḍi ur d issutl
ur issfld i irir
awiγ d aqqayn inw
ad tn ẓẓuγ γ izlan
ssuγ tn s imÏÏawn
gin tamust i tibḍit nnγ
urriγ d gim flγ nn tagziwin
am igigiln ijdr usmḍl
ar ẓmmant γ ilaÏÏn tullist
arunt γ izwagn tasutin
Ãkunt γ twargiwin
imaḍaln ikṛṛuẓn
zmmimnt anbdu γ iẓẓin n tfssut
saysant s ishuffutn n tguḍiwin
urriγ d gim flγ nn aẓaẓu
rbuγ d asqsi
mad riγ umiy n imanarn ?
ad sis ttaraγ iwiz inw
aylliγ d ufiγ iman
zdγn γ uγzu n tguri nnm
zwun γ irifi n uncuḍ nnm
flγ nn tanawt
γ igiwal n taḍḍangiwin
ar ttalγγ iftasn nn ingḍn
γ twallin nnm
ar ttalmγ γ tugawt
taγuyyit
ad as ssfldγ
macc nkki snalγ nn ḍaṛat
trmγ i ism inw
ar t ssfuḍγ
ha km inn hann tanawt
hann akkw timktit nnγ.