Faḍma Farras
Ungal ad iga wiss sin dar massa Zahra Diker, tura yad yan tga as s uzwl “Tiski tarjdalt”, d adlis ad iga g tẓṛgin n tirra; tazlɣa n iamaratn s tmaziɣt.
Taɣawsa izwarn rad tt iniɣ xf warra ad, iga tt ma s ar aɣ immal is d ku ass, ku tirmit n tirra, ku aḍṛiṣ is ar isimɣur s tutlayt nnɣ uggwar, d aylli tura massa Zahra ismd nn daɣ yat tsurift i tẓilt n tutlayt ad. nniɣ maya d acku ittyara s yat tutlayt immimn, s yat tɣarast nn ittggrn i usyafa iwatts nn tufrayin iggr asnt nn iklu tnt inn s yan ɣ ikwlan nns imnnawn.
Ungal ad, rksn gis iwrikn “ilarzg”, “lumi”, “luna”, “anna”… mk lli gis rksn ikwlan, ha gis imikk n aylli s nẓḍaṛ ad t nssiɣẓin, ha gis kigan n aylli nra nawgi t, agwin aɣ t, ha gis mad aɣ ittalln ar aḥbu n tslit n unẓaṛ yagwm aɣ d imikkuk g wuklan nns, ha d mad aɣ ittggan d inkrafn ɣ ugwns n yat tanawt issnfaln iɣf nns ku tikklit.
ɣ tudrt nga akkw iwrikn ɣ iggi n kra n tmsult, ku yan gitnɣ ittiystay as yan urtum, kra n ikwlan sis iẓlin, ku yan gitnɣ ar ittmaɣ ad ig aylli gis ira wada as yuran aylli s iqqan ad t ig yini t, iddr t iggi n tmsult ann.
Tanawt n wuklan, tga zud ukan tisit lli aɣ d immaln ignsiwn nnɣ nra nit nɣ nugwi, tga talli irban ɣayda n ubkkaḍ nn nssntal ɣ wallaɣn nnɣ, d tufrayin ann s nmmaɣ ad tnt nntl f wiyyaḍ mqqar immra.
Tizi lli smdɣ tiɣri n wungal ad, ifl d g ugwns inu kigan d usqqsi ittyagaln, ismuss nn giti kra, d is ka rad snimmrɣ talli t yuran xf taḍfi n tguri d usyafa, Tanmmirt xf umuddu ad immrwin ismrwi aɣ dis, Tanmmirt xf tizi ad n taḍfi da aɣ trzzf tguri nnm.
Stiɣ awn/t imikk g ungal ad, ssitmɣ ad t tɣrm:
“Lumi, is tssnt mckk n waggas ad ittasi uɣanib inu iɣ am ttaraɣ? Is tssnt is ar isswa ayda nnɣ s yidammn n wul nns izggwaɣn?Ayda nnɣ lli ssngḍn imakrn n yiɣman, is tssnt mad igan ayada n wanaw nnɣ nkki dim? aɣanib a tinu, aɣanib d tnfult d yat tswingmt, iɣ llan, anaruz nnɣ lli s rad daɣ nasi inuraz.” (P48)
