Amara: Muḥmmad Akunaḍ
Mad isarn alliɣ mmuttin imaziɣn lli tt inn kkanin gan yan uɣrf (peuple) ixatrn mk lli s tn isnuml (qualifier) Bn Xldun g zik alliɣ mzziyn ɣil ad g tmizar nsn?
Iga wad asqqsi imqqurn lli xf ur nufi ad nrar g tizi ad, mac iga asqqsi lli d iqqann ad izziwiz (tourmenter) tarwa n imaziɣn, ur d helli ar d ssnn ayd isarn g umzruy nsn, mac ard smmsskln asurs (situation) lli g llan ass ad. Amukris (le problème) iga t llig d tugtt n willi mi nttini imaziɣn d tmaziɣin ttun amukris ad, acku tamagit tamaziɣt ur sul darsn tgi ɣas yan ufrdis (élément) igzzuln bahra, nɣd ur t akkw tgi g tmgit nsn.
Willi d tilli issnn amukris n imaziɣn s tidt, gan tn willi d tilli frknin s tmagit tamaziɣt, tg darsn (ɣursn) anzgum (souci), talla nsn ( leur existence) tzdi d tmaziɣt; ur as d sul kkin mani, ur asn d tkki mani.
Ur ar sawalɣ xf igdudn n imaziɣn id war afrak lli mi sstunt tmmariwin n tudrt takuyasst (quotidienne) mad gan ula ma rad sul gin, ar sawalɣ xf tufut (élite) g tmaziɣin d imaziɣn willi d tilli uginin ad fsin lah tn, mk lli lah iɣrfan ggutnin n zik.
Asqqsi n: Max allig mzziyn imaziɣn g tmura nsn? Ur d iqqan ad irzm ɣas xf umzruy igrsn (stagné) iqqan ad irzm xf imal, ar t isrus umaziɣ xf ad issn aylli t ur ittajjan ad yimɣur zund akkw ingga ns; tarwa n iɣrfan yadn lli ur ad t zrin s umya iɣ isdus ixf ns ibikks i tmgit ns.
