Idya

Idya

I iman n Idya, tazzant ur ismdn umiyn n immas

Trgl sin isggawsn nns γ tmazirt ad lli tγal is tga tin nns, ar nn ttaẓ s tddminin n insi (bumHnd) d wuccn, ad didsn tmun γ usddi (1) n tddmint nnsn, tasddit tumẓ γ ultmas, imil tḍr Idya γ uγras ur ta nn tlkm insi d wuccn da sis ittqqln.
γ imi n urti n waḍil, insi d wuccn tkcm tn tkssaḍ, tmaïl nn Idya, iliḥ aḍu nns. Mar ad skrn ? iqqan d i tddmint nnsn ad tzzigz, ad tamẓ aγaras n wallas mklli myarn, taddmint n wass ad tga tin Idya, amallas yumẓ imi nns, iqqn imi n wallas ar kiγ d tḥaḍṛ Idya, acku taddmint ad tga tin nns, mac Idya laḥ tt, laḥ aḍu nns, laḥ taḍṣa nns, laḥ tazdgt nns… Iγama d insi d wuccn ar tn isskwmr usmmiḍ.
Inna Insi i wuccn :
–Ur nẓḍaṛ ad nkcm s urti bla Idya.
Issiγẓin t uccn :
-Taddmit nγ ur ar tssnti amr s lal nns.
Idya ar tbbag tddmint n insi d wucn, imil tccḍ tḍart nns tgllint γ uγras,. Tmmaγ ad tnkr, macc tillas n tγẓnt ar tt kkatnt γ udm nns, tmmaγ tgllint ad tsmd abrid nns, ad ur tṛẓ awal lli tkfa i insi d wuccn ; ilkm tt id baγrar yaws i tγwẓnt.
Had baba d innas lliln tt id, iγ tt yusi babas gr ifassn nns, tall tt innas s igiwal nns, mac » nggammi kwnt a lm3awnt » (2); baγrar yudd i tmazirt n Idya, tamazirt lli adlli tγal is tga tin nns, imil taf d tayafut s ar ttqql iwin tt tγwẓnin n » ugadir n tγwẓnin » (3), fln tamazirt nns ar gis ittsuḍ waḍu.
Inna Insi i wuccn :
– Is tssnt mad inγan Idya ?
-Uhu a dadda.
-Tnγa tt tamγart n babas n « Aica mmi yiγd « (4).
Ur tmmut idya, is ka tkcm s umiyn n tmaẓirt, tg γd nttat yan umiy da ttalsnt ist matnγ i tarwa nγ.

ẓaheur lahcen

—————————————