Tinhinan ẓelmaḍ
Yat tɣri ɣ ungal « Aɣrum n ihaqqaren » n mass Aksil Azergi. Ungal-a, da isawal ɣef yan uneɣmas ittyassnen s tirra-nnes ɣef tudert d umezruy n yimezdaɣ n udrar ameqwran, g imagraden-nnes itteffɣen g yiɣmisen. Ass mi d-iffeɣ seg ukurmu, yufa-d imarawen-nnes mmuten ur ten-d-issakel, iqqim min tawacult. Yuzen-t umeddakʷel-nnes Markus s ɣur Aksil nna igan ameddakʷel n babas, Aksil illan g yiɣrem n Tgedrin. Idda iqqim ɣur-s allig iswanfa, iɛent-as abrid s adrar ameqwran, acku ar irezzu ɣef ka n umsedrar as-ittalsen tamacahut n tudert-nnes ad ɣif-s isiwel g wungal-nnes.
Iswanfa ɣur-s ar tifawt, issken-as abrid ɣer iɣrem n Uwrir n Yimzilen. Iddu. Iney ɣur Sekku g tamirsidist-nnes ittenherwilen ɣef ubrid.G ubrid ikti-d temẓi-nnes ar deg-s iswingim, allig nn-beddan ɣef wuggug n yimesulta. Imsawal id-sen Sekku, ttren-asen tikarḍiwin-nnsen, allig t-inn gulan, suggzen-t, kksen-as tissufrannes afen-nn ɣur-s kra n yidlisen d yitsent tesfifin n tkabart n “Imesdurar”, ar t-seqsan mani-nn ira? Ma s idda? Inna: “nekk d aneɣmas, riɣ ad uruɣ ɣef udrar, ɣef izerfan n uwdan g tmurtnneɣ…” irar-as umsalu n wis da neqqan ineɣmasen ur da ttaǧǧan anaɣis-nnes ad yili, dinna g ufan ca n uneɣmas ad tkenfen. Inna ger-as d iɣef-nnes “yuf is ssbeɣseɣ iman-inew, mmten d argaz ula asen-festiɣ”, irura-asen awal, inna: “ aǧǧati, ur riɣ adgeɣ winnun ulatgam winu!”.
Ar itteddu imiḥ yaf yiwen umsedrar isem-nnes Meksa, innaas: “mecta aya ɣif-k rezzuɣ, xseɣ ad tilid ger medden nna ɣef aruɣ ungal-inu.”, ur iri Meksa ad as-yumu g wungal, ur iri ad ittukref ger isekkilen-nnes. Ar as-ittales uneɣmas ayenna yad yaru ɣef imesdurar, ssiɣen afa g umerdul, ttin-asen wuccan ar ten-suguren. Ar isawal uneɣmas allig igen Meksa, yasi-d aɣanib-nnes d walug ibdu diɣ ar itturu, imikk s imikk ard ttenmilin wuccan, imaḥ yakey d iqqucan-nnsen icwan ar ttcerragen tafekka-nnes, netta igren tafriwin s afa ireẓ aɣanib, uɣule wuccan rulen. Uccan winin ur iḥmilen imesdurar, ula ran ad ittyara yiɣef n yinẓad ɣif-sen, ur rin tidet ad tettyara ula ttissen ugdud. Aneɣmas seg wass g ibda tirra ɣef umrggaru g yimesdurar ayed tɣwebbez tilawt-nnes g wirga d yiniɣan d wuccan.
Ayenna t-umẓen yimsulta ar t-seqsan ɣef mayed as-isseknen abrid ɣer adrar, ggzen ɣif-s s titwat, isxʷertem ur da ittrara i yiseqsiten-nnsen, iggall ur izzenza Markus ula awd yan g yimeddukal-nnes. Idda g ubrid, ibedd-nn ɣef Meksa g udrar hat immut, ur issin nebren wuccan tafekka-nnes, zellɛen-tt. Izrey Meksa g udɣar, yuǧǧa tafekka-nnes i yiwaɣzniwen, iddu s iɣrem as-d-inmalan. ḍfaren-t allig nn-igula iɣrem n Uwrir n Yimzilen, wiyyha n unna t-iskecmen s ɣu-s ičča-t wafa. Kerfen-t s yan igejdi ammas n yiɣrem, deffir n uyenna t-id-ssafɣen ɣur yat temɣart tawessart g taddart-nnes. Nnan i uneɣmas yuf is tenɣid neɣ tukred ula tsawled ɣef yimezdaɣ n udrar, itter-asen awal allig isawel. Tenḍud temɣart tenna “idetta wawal-nnes, mec tram ad ttenɣim, nɣat-i akid-s!”, teldi-d uzzal seg titar n yiwen g yiregzen, tebbey akarif i uneɣmas. Ifesta umɣar, ig diɣ uneɣmas ilelli.
Ayenna iffeɣ ɣur temɣart, yameẓ abrid iddu, isal inarez ad yaf mami isselsa tamacahut-nnes. Dat ad ikcem s iɣrem n Tinifsan, iffer tiɣawsiwin-nnes g wakal ddaw tseklut n tasaft, af-ad as ur yini awd yan aweṭḥaḥ. Iddu iseqsa g umeddakʷel-nnes Wakli, maca ur t-inn-yufi, nnan-as iffeɣ iɣrem, mlen-as iɣrem g ila, iddu ẓar-s. Ayenna tyufa, yules-as mayed as-ijṛan allig iffeɣ dinnaɣ, isekcem yan umsebrid s taddart-nnes, ibedd id-s allig irul i yimsulta nna tiḍfaren. Inna i Wakli ad ɣif-s isiwel g wungal-nnes, maca ur iri. G ubrid-nes ɣer Agerḍ n Uẓru, imleqqay d yan urgaz g ubrid isem-nnes Iccu, smunen abrid acku ddan akʷ s yiwen udɣar, inna-as: “nekk da rezzuɣ ɣef ka n urgaz neɣ awd tameṭṭut izeddɣen ungal-inu.” Irar-as urgaz n wis ira ad yumu g wungalnnes, imdez uneɣmas ar as-ittales i Iccu ayenna yar, maca ur tissusim uyenna fell-as yaru uneɣmas, acku ira ad as-isnem aḍu, iwḥel g wawal d usselku… inker-d tifawt hat iffe Iccu tamacahut, issenker tirit ger isekkilen irul.
Inker uneɣmas yaley ɣer adrar, netta nn-igulan yinniy-d Iccu izwar i ukabar n yiregzen, ddan s adɣar nna g zzrin iḍ is t-inn ur ttafan, bḍan ɣef tkabarin, ar t-ttnadan. Yufa yan ifri, iffer dig-s. Nadan-t allig yaɣ yiḍ, iɣal uneɣmas is ddan, iffeɣ-d yinney Iccu issaɣ afa ar ittɛemmaṛ atag, iddu ẓar-s, iɣal is walu ɣas netta, tta immxiben gan Iccu d tamdit s t-ttamẓen, ayenna s day iɣʷejdem ttin-as iregzen. Izuḥ ikkes-d ajenwiy, isires-t i Iccu ɣef umeggreḍ, issiwed-ten s menɣiwt-nnes mec ur ddin. Iddeɣ-asen intel inaas i Iccu: “iwa mec trid ad id-sen tmuned teddud, trid ad nmun nekk id-k yallh!” imun id-s Iccu, ddun tanila n yiɣrem n Yiɣil n Yisemsiden, nitni t-inn-inmalan inniyen iserdasen hat tin-as, ar ten-sdiddiyen, irar-asen yiwen urgaz awessar awal, nɣin-t g udɣar, gin mulley i yimezdaɣ n yiɣrem, nɣan iregzen, tiwetmin, tislemyiwin… ur uǧǧin awd ccu: “tannayed s wallen-nnek, ha n mayed ran, da ttafan amdaz ig da nqqar mddn, ur rin ma ad isawaln!
