Laḥsn Zahur
Mars 2014
Tbidd γ umnid n tdabut n lkyuṣk s yat twila ilsan tuctal, udm nns yusi tifras n tmazirt lli s ur tzḍaṛ tγrmt ad tn gis tssfaḍ, ur ad nn tzri sin d mraw n usgåas, alln ns jjawnt g tzdgi urta tt id kcmnt tmuttal n tγrmt .
Tga d afus, tuγγwḍ d yan ugzzum n tfrt : « Kf iyi d i rbbi aγmis ittyaran g tfrt ad », tḍfr as d yat tfrt n idrimn. Kcmγ tt inn s wawal : « Ur bahra tmaïlt γ tγrmt ad? ». Trar d i usqqsi inw s uzmummg, tsqqsa yi « Tγrit may ad γ tfras inw ? », nniγ as « γriγ gisnt tazdgi n tmazirt d ufulki ns, mad igan tmazirt ? ».
Twwrḍi s tsga n iming, ar yi nn tmmal mad nn yaggugn, tasga γd tucka tmazirt nns, macc nkki ur ad nn çṛraγ amr tibrzdduγin lli iqqnn asayrur n tsga da yi nn tmmal. « Tzugt d s tγrmt kmmi d tawja nm?», zun d iγ nn iggr usqqsi ad inw i tsila n uåns nns , trkkkik imikk, tsmaqql gigi yan usmmaqql γ laḥ asmrdqqi lli, tkk yat tddalt n unzgum udm nns mqqaṛ tmmaγ ad t tssntl s uzmummg: « Dar yat twaja aγ lliγ, ḍufγ asn tazzant d unwal», tfss imikk zun d iγ trkkik, tḍfṛ:
« Mqqaṛ tggut twwuri d tmmara macc tfsus xf tin tmazirt. Ur ad issn lkcift d tkufant n tmazirt nγ amr walli tt iddrn». Sqqsaγ tt s unzgum da yi ikcmn: « Babam ak m id issifḍn?», tsmass ixf nns s uhu: « Imma », tra tgllint ad yi tḍi zg tammara d zzlḍ γ nddr, ur gis ttuγ awal ns lliγ ar didi tmssifiḍ « lkm a illi tawja nna da km iran s twwuri, Ur riγ a illi ad tddrt tammara ad γ ddrγ, ajj yi tt nkki lli tt imyarn timyur yi .. ad issfalki rbbi tudrt nm».
γ id aγ ismd wawal n tfruxt, gammiγ ad sul sawlγ, aγγwḍ as nn aγmis d mad d iγaman γ idrimn s yan uzmummg yusin taksna.
